حوار خاص لـ اوفسايد.. مروة الحواط : سعداء بما حققناه هذا الموسم و أزمات كرة القدم النسائية عرض مستمر
نادي مودرن سبورت لكرة القدم سيدات من أهم الأندية في مصر وحقق هذا الموسم نتائج متميزة في مسابقة الدوري العام وحتى الآن يحتل المركز الخامس ،وعن كل ما يحدث داخل النادي وعن الكورة النسائية في مصر ،اجرينا هذا الحوار مع الكابتن مروة الحواط المدير الفني لفريق مودرن سبورت للسيدات.
ما هي مدة التعاقد مع الفريق و كيف يرى مجلس الإدارة الفريق النسائي ؟
التعاقد بيكون سنوى لنهاية الموسم والكلام كان مع مجلس الإدارة مع دكتور وليد دعبس أن الفريق في أول موسم يبقي مع العشرة الكبار ويكون في المراكز الخمسة الأولي وده اللي حصل دلوقتي ان احنا في المركز الخامس خلف أندية كبيرة زي مسار والأهلي والزمالك ودجلة ، والخطة كمان أن من الموسم القادم هيكون فيه قطاع كامل في مودرن للكرة النسائية.
اهم المشاكل الموجودة في منظومة الكرة النسائية في مصر ؟
كنت اتمنى تحقيق نتائج أفضل وترتيب افضل في الدوري الموسم ده لكني اتصدمت بمشاكل كتير وأزمات في نظام المسابقة ،من المشاكل دي أن فيه فرقتين انسحبوا من الدوري بعد إعلانه و لجنة المسابقات سابو الأندية دي في الجدول ،وكان من سوء حظي كان فيه توقف دولي وبعد فيه اسبوع كمان باي ، وبعدها ارجع العب 3 ماتشات في اسبوع واحد ده الرجالة متتحملش ده .
رأيك في الأداء التحكيمي في منظومة الكرة النسائية وهل ده اثر على نتائج بعض المباريات ؟
عندنا مشاكل طبعا في التحكيم في محكمات لهم التقدير والاحترام ولكن فيه أخطاء فادحه ملهاش علاقة بكرة القدم ،وانا من أنصار وجود العنصر النسائي في أي مكان وبدعمهم ولكن كنت بصطدم بمحكمات لا تليق بالدوري الممتاز وحرام يضيع مجهود فريق بسبب أخطاء التحكيم ، وكمان فيه حكام بتعمل أخطاء ليا والاقيها تاني ماتش موجودة ليا في الملعب مفيش عقوبات كنت اتمنى يكون فيه رد فعل من لجنة الحكام وخاصة أن فيه اكتر من نادي تضرر من حكم بعينه وقدمو شكوى ضده ولكن مفيش اي قرار أو عقوبة بنشوفها .
اختيار الحكام وغياب المراقب في أغلب المباريات بياثر على المباريات ؟
طبعا بياثر بشكل كبير ،خاصة أن حكم المباراة مبيعرفوش مين معاهم والعكس حكم الراية مش عارفه مين معاها ،والمراقبات بتكون موجودة في مباريات معينة وباقي المباريات مفيش مراقب ،غياب لجنة الحكام اللي المفترض تحاسب الحكام وفين المراقبين اللي المفروض ينزلو كل المباريات عشان تنقل الصورة كاملة عن الحكام .
ماهو تقيييمك للملاعب التي تقام عليها مباريات كرة القدم النسائية؟
فيه ملاعب لا تصلح أن يتلعب عليها رياضة ولا تصلح لبني آدم أنه يمشي عليها ،مثلا في أحد المباريات كنت يواجه المقاولون العرب الملعب كان تراب لا يصلح ،لازم يكون في اهتمام ومش اي ملعب يتم الموافقة عليه ،وده في كتير من الماتشات بيتسبب لي في إصابات غير أن الحكام كمان مبيدوش الحماية الكافية للاعبات ،لدرجة اني بقيت مبطلبش حاجه من الحكم إلا حماية لاعبتي
ما تعليقك على غياب المسؤولين عن الكورة في مصر عن التواجد في مباريات الكورة النسائية ؟
معنديش تعليق بصراحة مفيش اي اهتمام والاهتمام فقط من جانب المسؤولين في الأندية مش من المسؤولين في إتحاد الكرة عندنا مثلا كابتن هيثم عرابي المدير التنفيذي والمهندس هشام عاطف عضو مجلس الإدارة والمسؤول عن ملف الفريق النسائي .
مدى تأثير الكورة النسائية بدخول الأهلي والزمالك وهل توقعتي المنافسة في الدوري بالشكل ده ؟
طبعاً وجود القطبين في الدوري هيودو الدوري في حته تانية من اهتمام ومن دعم واللي بدء بزيادة عدد اللاعبات الأجانب لتلات لاعبات والمنافسة أصبحت شرسة بين الأهلي والزمالك مع مسار ودجلة والأندية اصبحت بتعتمد على ميزانيات عالية عشان تقدر تنافس وكنت متوقعها فوز الأهلي باللقب ،الدوري كان صعب جدا واتوقع الموسم الجاي هيكون اصعب وخاصة بعد احتمال زيادة عدد اللاعبات الأجانب الموسم الجاي.
هل اسم الأهلي والزمالك له تاثير على قرارات الحكام خاصة أنهم مش متعودين على الضغط بالشكل ده ؟
طبعا المحكمات بتخاف من الأهلي والزمالك ومن اعتراضات المدربين ومن مدير الكورة في الفريق وبنشوف حكام بيتوترو لأن هي في النهاية سيدة ،لان للاسف كمان كان فيه اعتراضات غير مقبولة وكان فيه تجاوز وألفاظ بطريقة لا تليق .
كابتن هيثم عرابي كل ماتشاتنا بيحضر عمره ما اعترض ودايما بيقول ان مينفعش يعترض لأن في النهاية دى سيدة ،والمرة الوحيدة اللي اتكلم فيها وقام من مكانه كان عشان يرجع فريق انبي اللي هدد بالانسحاب في ماتشه معانا ، لكن مفيش اي مسؤول عندنا اعترض على الحكام .
ماهو تعلييقك على الأحداث اللي حصلت من جانب الجهاز الفني للزمالك في مباراتهم مع مودرن ؟
الحقيقة اللي حصل كان صعب جدا وانا اتكلمت مع المدير الفني للزمالك بطريقة اخوية اكتر من مرة ك اخت وعندي خبرة في الكرة النسائية وقلت له انت مدير فني نادي كبير ومينفعش الاعتراض بالشكل ده وان الأسلوب ده بيكون سبب انك تنطرد كتير ،لكن اللي حصل في ماتشنا كان صعب جدا.
عندكم مباراة مع الأهلي السبت القادم ..ماهي اخر الاستعدادات لمواجهة الأهلي ؟
النادي الاهلي منظومة قوية وعنده لاعيبة قوية ومحترفات على أعلى مستوى بنشتغل على المباراة بشكل كويس بدنياً وخططيأ ونفسياً ،قدمنا في الدور الأول مباراة قوية وخسرنا بهدف وكنا قريبين للعودة
اخر مباراة للفريق كانت أمام مسار والخسارة كانت كبيرة ..ازاي بتقدري توصلي للاعبات تقبل النتيجة حتى لو كبيرة وميحصلش إنسحاب زي ما بنشوف في ماتشات كتير ؟
انا عندي من 3_4 لاعبات عندهم خبرات في الدوري وكمان خبرات دولية وباقي الفريق خامات كويسة لكن تنقصهم الخبرة .. ودايما كلامي معاهم وكلام الإدارة العبي لآخر الوقت واعملي اللي عليكي والنتيجة بتاع ربنا ...في ماتش مسار النتيجة كانت قريبة 2/1 لكن بحكم الخبرة والامكانيات النتيجة وصلت ل 7 وكان الماتش مذاع على الهوا وتقبلنا النتيجة وكملنا لنهاية المباراة .
ما اسباب التجاوزات اللي بقينا نشوفها في المباريات ؟
لها عدة أسباب أولها أن مفيش عقاب صارم لأن اللي بنشوفه أن العقوبات بتكون أقل بتكير من اللي يستحقه الموقف والتصرف نفسه ، زي اللي حصل في مباراة زد العقاب كان اقل بكتير من اللي شفناها وكمان فين دور الحكم لانه ساعد أن المشادات توصل للمرحلة دي بسبب ضعف قراراته وطبعا خبرة اللاعبات أن أغلبهم متعودوش على الأجواء دي ،وكمان مفيش مراقب للمباراة ولو فيه فين دوره عشان يوصل اللي بيحصل بشفافية وينقل كل التفاصيل للمسؤولين عشان ياخدوا عقوبات كافية ،لكن كمان ده فيه مباريات مفيهاش مراقبين أمر صعب جدآ.
هل حدث تواصل مع كابتن محمد كمال بعد أحداث المباراة ؟
طبعا كابتن محمد كمال أبويا وهو له فضل كبير عليا في كل اللي وصلت له في كرة القدم كلاعبة ودلوقتي كمدربة..انا بالفعل كلمته واطمنت عليه بعد المباراة وهو قالي اللي حصل مهزلة وان حكم المباراة بوظ الماتش وموفرش الحماية للاعبته ، واتكلمنا أن فيه اوقات بيكون الإعتراض على حكم المباراة من جانب الفريقين ولازم يكون فيه تدخل من المسؤولين.
اخيرا هل بدا الاستعداد للموسم الجديد من خلال التدعيمات ؟
بالفعل اتكلمنا مع مجلس الإدارة من شهر و بدأنا نركز على الأماكن اللي محتاجنها لأن احنا عندنا تصور كمان أن فيه هيكون زيادة في أسعار اللاعبات المحلية وكمان المحترفات ،والحقيقة كل الدعم بنشوفه من الإدارة ودكتور وليد عبس داعم لينا وعاوز الفريق يبقي احسن واحسن وده اللي بنشتغل عليه الفترة الجاية خاصة أن مفيش وقت للراحة وبدء فترة القيد في شهر يونيو يعني مفيش راحة .
