علاء ميهوب يفتح النار على إمام عاشور بسبب الغياب عن رحلة الأهلي لـ تنزانيا
شن علاء ميهوب، نجم النادي الأهلي السابق، هجومًا قويًا على إمام عاشور، لاعب الفريق الأحمر، على خلفية غيابه عن السفر مع بعثة الأهلي إلى تنزانيا، لمواجهة فريق يانج أفريكانز التنزاني، في إطار منافسات دوري أبطال أفريقيا.
وقال علاء ميهوب، خلال تصريحاته عبر قناة «أون سبورت 1»: «لازم يا إمام عاشور، تبقى فاهم إنت موجود فين، إنت في النادي الأهلي، أكبر نادٍ في أفريقيا والشرق الأوسط، وناس كتير تتمنى بس تمشي جنب اسم الأهلي مش تكون واحدة من لاعيبته».
وأضاف: «إنت بقالك 3 سنين في الأهلي، وقبلها كنت في الزمالك، وهو كمان نادٍ كبير وله تاريخه وتقاليده، ونفس الكلام اللي بقوله على الأهلي ينطبق على الزمالك، لأنه نادٍ صاحب بطولات وجماهيرية كبيرة، ولما جيت الأهلي بتقول معملتش حاجة، رغم إنك عملت مشاكل كتير واتخصم منك فلوس في فترات سابقة».
وتابع: «لازم تكون عارف إن الأهلي قيمته في جماهيره، وإدارته، وبطولاته، وباللاعبين الكبار اللي شرفوه عبر تاريخه، وفي أسماء صعب جدًا أقارنها بيك، لأنهم في مكانة مختلفة، مشيوا، والأهلي فضل مستمر ببطولاته وجماهيره، وموقفش على أي حد».
واستكمل: «لو مش مدرك قيمة الأهلي وجماهيره، أنا هقولك تعرفها إزاي، لازم تبقى عارف إن احترامك للنادي وجماهيره شيء أساسي، مهما كنت لاعب كبير، لكن 3 سنين في الأهلي حاجة، ومشوارك كله في الكورة حاجة تانية».
وواصل ميهوب حديثه موجهًا رسالة مباشرة لإمام عاشور: «في الأهلي خدت نجومية كبيرة، واتسلطت عليك الأضواء، واستفدت ماديًا بشكل أكبر، بس خليك حذر، وما تسيبش شيطانك يضحك عليك وتقول أنا أكبر شوية على الأهلي، أقسم بالله ده لا يفرق مع الأهلي ولا مع جماهيره».
واختتم: «خد بالك تعمل أي تصرف تاني يسيء للأهلي أو لجماهيره، الجماهير اللي رفعتك لفوق قوي، هي نفسها قادرة تنزلك لتحت، ويارب تكون اتعلمت من اللي حصل».
