آدم وطني يحسم الجدل لـ"أوفسايد" حول رحيل إمام عاشور عن الأهلي والعروض الأوروبية
كشف آدم وطني، وكيل أعمال الدولي إمام عاشور، لاعب الفريق الأول لكرة القدم بالنادي الأهلي، كواليس موقف اللاعب من الرحيل عن القلعة الحمراء خلال فترة الانتقالات الصيفية الحالية، في ظل رفض إدارة النادي التفريط في خدماته.
وقال آدم وطني، في حوار خاص وحصري لـ"أوفسايد": "أنا سامع كلام كتير غلط بيتقال في الإعلام بقاله كام يوم، ولحد دلوقتي اخترت إني أفضل ساكت، احترامًا لمصلحة كل الأطراف، وعلى أمل إن إدارة الأهلي يكون موقفها مختلف".
وأضاف: "من كام شهر، قعدت مع مسؤولي الأهلي علشان أعرف بشكل واضح هما عايزين يعملوا إيه بخصوص مستقبل إمام، وكان ردهم واضح جدًا: النادي مش راضي عن مستوى وأداء إمام، ومش عنده رغبة في تجديد عقده".
وأوضح وكيل إمام عاشور أن اللاعب تأثر نفسيًا من موقف النادي، لكنه احترم قرار الإدارة وبدأ البحث عن فرصة للاحتراف خارج مصر.
وتابع: "رغم إن إمام كان محبط ومتضايق جدًا من موقف النادي، احترمنا القرار وبدأنا نشتغل بشكل جدي على فرص للاحتراف بره مصر".
وكشف آدم وطني عن تلقي إمام عاشور عرضًا من أحد الأندية الفرنسية خلال فترة الانتقالات الشتوية الماضية، قائلًا: "في يناير، وصل لنا عرض من نادي فرنسي، وقتها الأهلي طلب مننا إننا مانضغطش في آخر أيام الميركاتو علشان مانعملش مشاكل داخل النادي، وإحنا احترمنا طلبهم وفضلنا مصلحة الأهلي".
وأشار إلى أن موقف الأهلي قبل مشاركة إمام عاشور مع منتخب مصر في كأس العالم كان يميل إلى رحيل اللاعب، موضحًا: "قبل كأس العالم، الكلام كان لسه زي ما هو، ولمصلحة النادي واستقرار أوضة اللبس، كان الأفضل إن إمام يمشي، خصوصًا إن النادي كان شايف إنه مش قادر يلبي طلباتنا".
وأكد وكيل إمام عاشور أن اللاعب أصبح يمتلك في الوقت الحالي عروضًا جادة، لكنه فوجئ بتغيير موقف النادي الأهلي تجاه رحيله.
وقال: "على الأساس ده اشتغلنا وتحركنا، والنهارده عندنا عروض حقيقية وجدية، لكن رغم كده النادي غير موقفه مرة تانية، عكس كل الكلام والوعود اللي اتقالت لنا قبل كده".
وأضاف: "المشكلة دلوقتي إن مفيش مسؤول عنده استعداد يتحمل قرار بيع إمام عاشور، لأن كل واحد خايف من تبعات القرار على نفسه".
وشدد آدم وطني على أن تغيير موقف الأهلي تسبب في أزمة ثقة بين الطرفين، قائلًا: "لما نادي يقول كلام للاعب وللناس اللي حواليه، وبعد كده يتصرف عكس الكلام ده، طبيعي جدًا إن الثقة تتكسر".
وأكد أن تعامل اللاعب ووكيله مع الأهلي خلال الفترة الماضية كان قائمًا على الاحترام، مطالبًا إدارة النادي بالمثل.
وأوضح: "إحنا طول الوقت احترمنا الأهلي ومصلحته، وكل اللي بنطلبه النهارده هو نفس الوضوح والاحترام مع إمام، واحترام الكلام والوعود اللي اتقالت واتقدمت لنا".
وتحدث آدم وطني عن أهمية احتراف إمام عاشور في المرحلة الحالية من مسيرته، مؤكدًا أن اللاعب يرى أن الفرصة الحالية قد تكون مهمة لتحقيق حلمه باللعب في أوروبا.
وقال: "إمام عاشور النهارده واحد من أفضل لاعيبة مصر والقارة الأفريقية، وفي سنه الحالي، الفرصة دي ممكن تكون من آخر الفرص الحقيقية قدامه علشان يحقق حلمه ويلعب في أوروبا، وفي ظروف كويسة وفي أفضل فترة من مسيرته".
ووجه وكيل اللاعب رسالة إلى مسؤولي الأهلي، خاصة نجوم النادي السابقين الموجودين حاليًا في إدارة القلعة الحمراء.
وقال: "كتير من نجوم الأهلي السابقين الموجودين النهارده في إدارة النادي كانوا أكيد يتمنوا فرصة زي دي لما كانوا لاعيبة".
وأردف: "أنا متأكد إن لو بكرة جبت عرض جدي من نادي أوروبي لابن واحد من المسؤولين دول، نظرتهم للموضوع ورد فعلهم هيكونوا مختلفين تمامًا".
واختتم آدم وطني حديثه برسالة مباشرة إلى مسؤولي الأهلي: "علشان كده أنا بطلب منهم حاجة واحدة بس: اتعاملوا مع إمام كأنه ابنكم، فكروا في مستقبله، في مسيرته، وفي الحلم اللي نفسه يحققه".
وأضاف: "إمام قدم كتير للأهلي، والنهارده يستحق إنكم تسمعوه، وتحترموا رغبته، وتقدّروه بالقيمة والمكانة اللي يستحقها".
