حوار خاص: محمود عبد الحكيم، الزمالك فريق كبير و أفضل لاعب في مصر حالياً اشرف بن شرقي(فيديو)
محمود عبد الحكيم يعد واحدا من أمهر اللاعبين في تاريخ كرة القدم المصرية، وعلى الرغم من عدم ارتدائه قميص أحد القطبين، فإنه لا يزال يحتفظ بتاريخ كبير واسم لامع في الرياضة المصرية. وقد كانت أفضل فتراته في مشواره الكروي بقميص نادي بتروجيت والنادي المصري البورسعيدي، حيث كان عبد الحكيم معشوق الجماهير البورسعيدية.
في حوار خاص ل اوفسايد مع الكابتن محمود عبد الحكيم عن أداء النادي الأهلي في كأس العالم للأندية والخروج المبكر من البطولة.
س: رأيك في أداء النادي الأهلي في كأس العالم للأندية؟
بختلف مع كتير من الناس اللي بيهاجموا النادي الأهلي، أنا شايف إن اللاعبين قدموا أداء كويس في المباريات اللي لعبوها، والفريق كان بيبقى الأفضل في الشوط الأول، لكن واضح إن الفريق مش في حالة بدنية كويسة، بدليل إن المستوى بيتراجع في الشوط التاني. الفريق محتاج تدعيمات في خط الدفاع، لكن الأهلي بشكل عام فريق مرعب، وهيفضل مرعب في الدوري وفي أفريقيا لأي حد.
س: من هو أفضل لاعب في النادي الأهلي من وجهة نظرك؟
لاعيبة الأهلي كلهم جامدين جدًا، لكن أنا بحب أشرف بن شرقي، و بشوف إنه أفضل لاعب في الدوري المصري، وعدم مشاركته بشكل أساسي لغز. ولو كان شارك وقت أطول، كان هيبقى أفضل ومؤثر بشكل أكبر كمان.
س: رأيك في تولي مدير فني جديد للأهلي قبل البطولة رغم نجاح عماد النحاس في مباريات الدوري؟
أنا مقدرش أعلق على ده، لأنه قرار يخص إدارة النادي الأهلي، وهم أكيد أقدر على اتخاذ القرار المناسب.
س: رأيك في صفقة انتقال زيزو للنادي الأهلي؟
زيزو لاعب كبير، وهيكون إضافة للنادي الأهلي. ولو فيه 3 أو 4 لاعيبة جامدين في مصر، فأكيد زيزو واحد منهم. لاعب كبير وكواليتي مختلف.
س: هل اللاعب المصري بيبان مستواه الحقيقي لما يحتك بالمستوى العالمي؟
اللاعب المصري ما يقلش عن الأوروبي، والدليل إن النادي الأهلي قدم بطولة كويسة وأداء كويس. الفرص اللي بتضيع دي سوء توفيق مش أكتر، يعني بن شرقي لما يضيع فرصة مش معناه إنه مش لاعب كويس، لا، هو لاعب كبير، لكن مفيش توفيق.
س: هل الزمالك يقدر ينافس الأهلي الموسم الجاي خاصة بعد التدعيمات القوية؟
الزمالك فريق كبير، و الكورة فيها كل حاجة، ومحدش عارف إيه اللي هيحصل.
