حوار خاص لـ "اوفسايد " .. مدرب المصري : كرة القدم النسائية اختلفت كثيراً بوجود الأهلي والزمالك ومنظومة التحكيم تحتاج إلى تطوير
تحدث الكابتن حسام حمادة المدير الفني لفريق المصري لكرة القدم النسائية عن مستقبله مع الفريق الموسم القادم وعن رؤيته للمسابقة و كيف يري وجود قطبي الكرة المصرية في الكرة النسائية.
هل انت مستمر في القيادة الفنية لفريق المصري الموسم القادم وما هي الاستعدادات للموسم الجديد ؟
إن شاء الله مستمر مع الفريق الموسم القادم ،واحنا بالفعل بنستعد للموسم الجديد بالتفاوض مع صفقات تضاف للفريق لكن حتى الآن كلها مفاوضات ولا يوجد إنهاء لصفقة بشكل نهائي حتى الآن ".
ماهو الدعم الذي تتلقاه من مجلس إدارة النادي وماهو طموح الفريق ؟
المصري نادي كبير وعنده جمهوره ويوجد رئيس نادي اسم كبير وبيسعو دائما للمنافسة ،و فيش حد هيكون حابب ان النادي المصري يكون في مركز من المراكز الأخيرة وده اللي ادارة النادي بتسعى ليه ان النادي يكون في مكانه الطبيعي زي ما هو موجود في الرجالة بالظبط".
كيف يتم الاستعدادات للموسم الجديد خاصة مع ضيق الوقت وإعلان إتحاد الكرة فتح القوائم في شهر يونيو المقبل ؟
كل الأندية بدأت تدعم صفوف فريقها للموسم الجديد وده اللي احنا بنعمله دلوقتي واحنا بادئين من بدري السعي ان احنا نتعاقد مع لعيبه ونعمل كل اللي نقدر عليه باننا نجمع اكبر عدد من اللاعبين المميزين ليكون الموسم القادم موسم استثنائي ونكون في المركز اللي يليق بالنادي المصري البورسعيدي ".
هل انت مع زيادة عدد اللاعبات الأجانب الموسم المقبل ؟
اكيد ما اتمناش ان عدد المحترفين يزيد عشان ده ياثر على الفرق اللي ما فيش فيها محترفين وكمان إن العدد يزيد لخمسة الموضوع هيكون صعب جدا على اندية كتير قوي وعلى المنتخبات الوطنية "
كيف ترى فرصة المصري على المنافسة خاصة مع وجود أندية مسار والأهلي والزمالك ؟
اكيد طبعا النادي المصري يقدر ينافس إحنا مش اقل من اي حد في الاندية دي بل بالعكس إحنا زي الاهلي والزمالك وكل الإمكانيات موجودة وكمان بنتفوق على مسار والبنك ودجلة في انه ورانا جمهور كبير وجمهور المصري البورسعيدي من اقوى الجمهور في مصر ونقدر ننافس خاصة في ظل وجود مستر كامل ابو علي ".
كيف ترى غياب الحضور الجماهيري في مباريات كرة القدم النسائي ؟
احنا في اول سنة كان الجمهور ورانا بشكل كبير قوي وبيدعم الفريق في المباريات اللي بتتلعب في بورسعيد غير الدعم اللي بنلاقيه من الناس في الشارع واللي عنده طموح الفوز ويكون الفريق في احسن مكان وده اللي احنا بنحاول نعمله دلوقتي ، وبنحاول ان احنا نكون في احسن مكان وانا كمدير فني للفريق اتمنى اني احقق بطولة للنادي ولكل شعب بورسعيد اللي اكيد هيكون سعيد بده "
ماهو رأيك في موعد إقامة المباريات واللي اشتكى منها أندية كثير الموسم الحالي؟
كل فريق كان بيلعب ماتش واحد يوم الجمعة ايا كان وقت الماتش الساعه 3:00 الساعة 4:00 في رايي مكنتش مشكلة زي ما تكون الماتشات يوم الاثنين والجمعة و السبت دي المشكلة الوحيدة اللي بتاثر على الفرق زي بالظبط اني العب اخر 6 ماتشات ليا في 20 يوم وده كان صعب جدا على اي فريق وده اللي اثر على فرقة زي فرقة الجونه انها تتراجع في النتائج مع العلم ان فرقه الجونة من افضل الفرق اللي موجوده في المجموعة اللي كانت بتنافس للهروب من الهبوط .
تقييمك للأداء التحكيمي في مسابقة الدوري الموسم الحالي ؟
التحكيم الموسم ده اثر على الفرق كلها ومفيش فريق مشتكاش من التحكيم وده نتيجة لعدم وجود خبرة من المحكمات اللي بتيجي تبص على تاريخها بتلاقي ان هي ما لعبتش كورة كتير او ممكن تكون لعبة موسم واحد بس ودرجة ثانية او ثالثة وده بيقول ان الخبرة مش موجودة بشكل كافي ان هي تكون حكم ،وكمان فيه محكمات ضعيفة الشخصية وبيحاولوا يعوضو ده في انهم يزعقوا مع الاجهزة، إضافة أنهم معندهمش الثقة في بعضهم تلاقي حكم الراية يحسب حاجة وحكم الساحة يحسب حاجه ثانية و بيتجاهلوا بعض كثير قوي فالتحكيم فعلا له عامل كبير قوي في التاثير على المسابقة وانا اتمنى بجد ان يكون في رقابة على التحكيم الموسم الجاي خصوصا ان الموسم الجاي هيكون اقوى موسم في تاريخ الكرة النسائية انا بقالي فوق التسعة او العشر سنين في الكره النسائية فباكد لك ان الموسم الجاي هيكون موسم قوي جدا جدا ".
كيف ترى مشاركة القطبين الأهلي والزمالك في الدوري هذا الموسم وهل اضافو لكرة القدم النسائية في مصر ؟
الكرة النسائية من غير الاهلي والزمالك كانت شبه اعلاميا مش موجودة وعلى ارض الواقع مش موجودة برده ،لكن بعد دخول الاهلي والزمالك الموضوع اختلف تماماً إعلامياً وده كان اهم حاجه اعطى قوة للمنافسة وكان سبب اهتمام كبير من المسؤولين وحتى من الناس في الشارع .
هل تحظي كرة القدم النسائية باهتمام من المسؤولين ؟
لا يوجد إهتمام من المسؤولين وده أمر غريب وده بيظهر كمان في العقوبات الغير كافية على بعض الظواهر السلبية في الدوري زي ظاهرة الإنسحاب واللي زادت بسبب عدم وجود عقوبات قوية .
أمنية كنت تتمنى حدوثها هذا الموسم ولم تحدث ؟
كنت اتمنى كاس مصر الاندية كلها تشارك فيها ما يكونش الموضوع اختياري للاندية اللي تقدر تدفع قيمة المسابقة لان بطولة زي كاس مصر لازم تكون بطولة قوية ويكون فيها كل الفرق سواء من القسم الاول او القسم الثاني ده هيدي شكل واحتكاكات كويسة كل الاندية هتستفاد منها ، لمشكلة ان المبلغ 10000 جنيه ممكن يكون فعلا بسيط على معظم الاندية بس على انديه ثانية المبلغ مش بسيط خصوصا فعلا اللي هو انا اقول لنفسي انا هدفع 10000 جنيه وانا مش عارف الاعب مين يعني ممكن اقع مع فريق قوي زي مسار وابقى دفعت الفلوس غير مصاريف الماتش واتغلب ويكون ماتش واحد ، فانا لو بشارك من غير ما ادفع ال 10000 الموضوع مش هيكون فارق معايا قوي ".
ماهي أمنياتك لفريق المصري الموسم القادم ؟
اتمنى ان احنا نقدر ندعم بشكل كويس الفريق واننا نظهر بشكل يليق باسم وجماهيرية النادي المصري ونقدر نحقق من الهدف المطلوب أن احنا نحققه ".
