شوبير ينتقد تأخر الزمالك في تقديم مستنداته بقضية زيزو: ليه لسه مقدمتوش الورق؟
علّق الإعلامي أحمد شوبير على تطورات أزمة نادي الزمالك مع لاعبه السابق أحمد سيد زيزو، مشيرًا إلى أن الملف يشهد جدلاً كبيرًا بسبب تأخر النادي في تقديم مستنداته إلى اتحاد الكرة المصري، رغم الحديث المتكرر عن جاهزية الأوراق التي تثبت موقفه القانوني.
وقال شوبير، خلال تصريحاته الإذاعية عبر برنامجه على أون سبورت إف إم: "كلنا بقالنا فترة بنتكلم عن قضية زيزو وشكوى الزمالك واللاعب، والموضوع بقى حكاية طويلة جدًا، لكن اللي حصل إن الزمالك كان موجود في اتحاد الكرة للرد على ما قدمه زيزو، إلا إن فريق عمل الزمالك طلب شهر كامل لتجهيز المستندات".
وأضاف: "بصراحة استغربت، لأن الزمالك من بدري بيأكد إن عنده كل الأوراق والمستندات اللي تثبت حقه، فليه ما قدمتهاش؟! ليه لسه بتجهزها؟ طالما واثق ومعلن ده قدام الجمهور، يبقى طبيعي تكون جاهز من البداية".
وأوضح شوبير أن القضية تتعلق بمبالغ مالية كبيرة بين الطرفين، قائلاً: "زيزو بيقول إن له أكتر من 80 مليون جنيه عند الزمالك، بينما الزمالك بيؤكد إن اللاعب مديون له بحوالي 20 مليون جنيه، وكل طرف بيقدم أوراقه لإثبات موقفه".
وتابع شوبير حديثه منتقدًا بطء الإجراءات داخل النادي الأبيض: "احنا داخلين على نوفمبر، وبعدها هييجي التوقف الدولي ثم كأس الأمم الإفريقية، وإحنا مش من النوع اللي بيحسم بسرعة، فليه التأجيل ده كله؟ لازم الزمالك يحسم موقفه ويقدم مستنداته، يا يكسب القضية يا يعلن إنه ما عندوش أوراق كافية".
وأشار شوبير إلى أن ما يحدث يربك الرأي العام الزملكاوي، قائلاً: "الناس محتارة، وبتسمع تصريحات كتير مش واضحة، فلازم يكون في شفافية ومصداقية، التصريحات قبل ما تطلع لازم تتراجع كويس، لأن ده بيمس سمعة النادي وجمهوره".
واختتم حديثه برسالة مباشرة لإدارة الزمالك: "أتمنى إن الزمالك يجهز أوراقه ويقدّمها الشهر ده، عشان يريح نفسه وجماهيره، بدل ما نظل نتكلم في نفس القصة بدون حسم".
